കെഎസ്ആർടിസിയിൽ മദ്യക്കടത്ത്: ഡ്രൈവർക്ക് സസ്പെന്ഷൻ, കണ്ടക്ടറെ പിരിച്ചുവിട്ടു

കോട്ടയം: കെഎസ്ആർടിസി പൊൻകുന്നം ഡിപ്പോയിലെ മണക്കടവ് ഫാസ്റ്റ് പാസഞ്ചർ ബസിൽ വിദേശമദ്യം കടത്തിയെന്ന പരാതിയിൽ ഡ്രൈവർ വി.ജി. രഘുനാഥനെ സസ്‌പെൻഡ് ചെയ്‌തു. താൽക്കാലിക കണ്ടക്ടർയായ ഫൈസലിനെ പിരിച്ചുവിട്ടു.

ഈ സംഭവത്തിൽ, ഓഗസ്റ്റ് 10- ന് കോർപ്പറേഷൻ വിജിലൻസ് സ്‌ക്വാഡിന്റെ പരിശോധനയിൽ ബസ്സിനുള്ളിൽ കണ്ടക്ടറുടെ സീറ്റിനടിയിലെ പെട്ടിയിൽ നിന്ന് 750 മില്ലിലിറ്റർ വീതമുള്ള അഞ്ചു കുപ്പി വിദേശമദ്യം കണ്ടെത്തിയത്. മദ്യം എക്‌സൈസിന് കൈമാറിയിട്ടുണ്ട്, സംഭവത്തിൽ കേസ് എടുക്കുകയും ചെയ്‌തു.

മദ്യം കടത്തിയത് കോർപ്പറേഷന്‍റെ സൽപ്പേരിനു കളങ്കം വരുത്തിയെന്നും ഗുരുതര കൃത്യവിലോപവും ചട്ടലംഘനവുമാണെന്നും ചൂണ്ടിക്കാട്ടിയാണ് ഗവ. അഡീഷണൽ സെക്രട്ടറിയും വിജിലൻസ് വിഭാഗം എക്‌സിക്യൂട്ടീവ് ഡയറക്ടറുമായ എ. ഷാജി നടപടി സ്വീകരിച്ചത്.