സത്താർ കായംകുളത്തിന്റെ ഖബറടക്കം ഇന്ന്

റിയാദ് : അന്തരിച്ച ഒഐസിസി സൗദി നാഷണൽ കമ്മിറ്റി ജനറൽ സെക്രട്ടറി സത്താർ കായംകുളത്തിന്റെ ഖബറടക്കം ഇന്ന് ( വെള്ളി ) വൈകീട്ട് 6 മണിക്ക് സ്വദേശമായ കായംകുളം എരുവ ജുമാ മസ്ജിദിൽ നടക്കും.

ഇന്നലെ വൈകീട്ട് ശ്രീലങ്കൻ വിമാനത്തിൽ റിയാദിൽ നിന്നും തിരുവന്തപുരത്തേക്കു കൊണ്ടുപോയ ഭൗതീക ശരീരം ഇന്ന് രാവിലെ ബന്ധുക്കൾ ഏറ്റുവാങ്ങി സ്വദേശത്തേക്കു കൊണ്ടുപോയി.അവസാനമായി കാണാനും മയ്യത്തു നമസ്ക്കാരത്തിനുമായി റിയാദിലെ നാനാ തുറകളിൽ നിന്നും നിരവധി പേർ പങ്കെടുത്തു.

ഒഐസിസി റിയാദ് സെൻട്രൽ കമ്മിറ്റി മൂന്നു ദിവസത്തെ ഔദ്യോഗീക ദുഃഖാചരണം പ്രഖ്യാപിച്ചു. പുനഃസംഘടനയുമായി ബന്ധപ്പെട്ടു ഒഐസിസി ഇന്ന് നടത്താനിരുന്ന എല്ലാ സമ്മേളനങ്ങളും മാറ്റി വെച്ചതായി അറിയിച്ചു. ഇന്ന് ( വെള്ളി ) വൈകീട്ട് 3 മണിക്ക് മലസ് അൽ മാസ്സ് ഓഡിറ്റോറിയത്തിൽ മയ്യത്തു നിസ്കാരവും അനുശോചന സമ്മേളനവും നടത്തും.

പക്ഷാഘാതത്തെ തുടർന്ന് മൂന്നു മാസകാലത്തോളം റിയാദ് കിംഗ് സഊദ് മെഡിക്കൽ സിറ്റി ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലായിരുന്നു. എന്നാൽ കഴിഞ്ഞ ദിവസങ്ങളിൽ സുഖം പ്രാപിക്കുന്നതിൽ പുരോഗതി ഉണ്ടായെങ്കിലും ബുധൻ ( 15-10-2023) ഉച്ചയോടെ പൾസ് കുറയുകയും മരണം സംഭിവിക്കുകയിരുന്നു.