പാരീസ് ഒളിമ്പിക്സ്; അമ്പെയ്ത്തിൽ അങ്കിത- ധീരജ് സഖ്യം ക്വാർട്ടറിൽ

പാരീസ്: പാരീസ് ഒളിംപിക്സിൽ അമ്പെയ്ത്തിൽ ഇന്ത്യയ്ക്ക് മെഡല്‍ പ്രതീക്ഷയായി മിക്‌സഡ് ടീം ഇനത്തില്‍ അങ്കിത ഭഗത്-ധീരജ് ബൊമ്മദേവര സഖ്യം ക്വാര്‍ട്ടറില്‍. ഇന്‍ഡൊനീഷ്യയുടെ ഡിയാനന്ദ ചൊയ്‌റുനിസ-ആരിഫ് പാംഗെസ്തു സഖ്യത്തെ 5-1 ന് പരാജയപ്പെടുത്തിയാണ് ഇന്ത്യന്‍ സഖ്യത്തിന്റെ ക്വാര്‍ട്ടര്‍ പ്രവേശനം.

ക്വാര്‍ട്ടറില്‍ സ്‌പെയിനാണ് ഇന്ത്യയുടെ എതിരാളി. ഒന്നാം സെറ്റും (37-36), മൂന്നാം സെറ്റും (38-37) സ്വന്തമാക്കി നാലു പോയന്റ് നേടിയ ഇന്ത്യ ജയമുറപ്പിക്കുകയായിരുന്നു. രണ്ടാം സെറ്റ് സമനിലയിലായതോടെ (38-38) പങ്കിട്ട ഒരു പോയന്റ് മാത്രമാണ് ഇന്‍ഡൊനീഷ്യന്‍ സഖ്യത്തിന് നേടാനായത്.