പമ്പുകൾക്കു സംരക്ഷണ നിയമം വേണം: പെട്രോളിയം ട്രേഡേഴ്സ് ഫെഡറേഷൻ

കൊല്ലം: രാത്രികാലങ്ങളിൽ പെട്രോളിയം പമ്പുകൾക്കു നേരേ നടക്കുന്ന അതിക്രമങ്ങൾ തടയാൻ ആശുപത്രി സംരക്ഷണ നിയമത്തിന്റെ മാതൃകയിൽ പ്രത്യേക നിയമ നിർമാണം നടത്തണമെന്ന് ഓൾ കേരള ഫെഡറേഷൻ ഒഫ് പെട്രോളിയം ട്രേഡേഴ്സ് സംസ്ഥാന കമ്മിറ്റി യോ​ഗം ആവശ്യപ്പെട്ടു. രാത്രികാലങ്ങളിൽ പമ്പുകൾ ആക്രമിക്കുന്നതും ജീവനക്കാരെ ആക്രമിച്ചു പരുക്കേല്പിക്കുന്നതും നിത്യസംഭവമാണ്. ആക്രമങ്ങളിൽ ജീവൻ നഷ്ടപ്പെട്ടവ​രുമുണ്ട്. ഈ സാഹചര്യത്തിൽ പമ്പുകൾക്കും ജീവനക്കാർക്കും ഉടമകൾക്കും സംരക്ഷണം നൽകുന്ന നിയമം ഉടനുണ്ടാക്കണമെന്ന് യോ​ഗം ആവശ്യപ്പെട്ടു.
അല്ലാത്ത പക്ഷം ശക്തമായ പ്രക്ഷോഭത്തിന് ഫെഡറേഷൻ നിർബന്ധിതമാകും. പമ്പുകൾക്ക് സംരക്ഷണം നൽകുന്നില്ലെങ്കിൽ പമ്പുകളുടെ പ്രവർത്തനം രാവിലെ ഏഴു മുതൽ വൈകുന്നേരം ഏഴു വരെയായി പരിമിതപ്പെടുത്തുമെന്നും യോ​ഗം മുന്നറിയിപ്പ് നൽകി.

ഫെ‍ഡറേഷൻ സംസ്ഥാന പ്രസിഡന്റായി ടോമി തോമസ് (ആലപ്പുഴ), ജനറൽ സെക്രട്ടറിയായി സഫാ അഷറഫ് (കൊല്ലം), ട്രഷറാറായി ബി. മൂസാ ചെർക്കും (കാസർ​ഗോഡ്) എന്നിവരെ തെരഞ്ഞെടുത്തു.

മറ്റു ഭാരവാഹികൾ:
വൈസ് പ്രസിഡന്റുമാർ
മൈതാനം വിജയൻ, കൊല്ലം (ദക്ഷിണ മേഖല), കെ.എസ്. കോമു എറണാകുളം (സെൻട്രൽ സോൺ), ഷംസുദീൻ കോഴിക്കോട് (ഉത്തര മേഖല).
ജോയിന്റെ സെക്രട്ടറിമാർ: രവിശങ്കർ (പത്തനംതിട്ട), ശ്രീരാജ്, (പാലക്കാട്), എം.എസ്. പ്രസാദ് (തിരുവനന്തപുരം), സുനിൽ ഏബ്രഹാം (കോട്ടയം).