'സിദ്ധരാമയ്യയ്ക്കും എനിക്കും എതിരെ കേരളത്തിലെ ക്ഷേത്രങ്ങളിൽ പൂജ': ഡി കെ ശിവകുമാർ

ബെംഗളൂരു: കർണാടക സർക്കാരിനെതിരെ ഗൂഢാലോചനകൾ നടക്കുന്നതായി ഡി കെ ശിവകുമാർ. കർണാടകയിലെ കോൺഗ്രസ് സർക്കാരിനെ ഇല്ലാതാക്കാനുള്ള ശ്രമത്തിന്റെ ഭാഗമായാണ് ഇത്തരത്തിലുള്ള പ്രവർത്തികൾ നടക്കുന്നതെന്നും ശിവകുമാർ പറഞ്ഞു. തന്നെയും മുഖ്യമന്ത്രി സിദ്ധരാമയ്യയും ലക്ഷ്യം ഇട്ട് കേരളത്തിലെ ക്ഷേത്രത്തിൽ നടന്ന മൃഗബലിയെ കുറിച്ച് തനിക്ക് വിവരം ലഭിച്ചതായും അദ്ദേഹം അവകാശപ്പെട്ടു.

ആരാണ് യാഗം നടത്തിയത്, ആരാണ് ഇത്തരം ഗൂഢാലോചനകൾ നടത്തുന്നത്, ആരൊക്കെയാണ് അതിൽ പങ്കാളികൾ എന്നൊക്കെയുള്ള വിവരങ്ങൾ തനിക്ക് അറിയാം എന്നും ശിവകുമാർ പറഞ്ഞു. ആരെയും പേരെടുത്ത് പറയാതെ രാഷ്ട്രീയ എതിരാളികൾ ആണ് ഇത്തരത്തിലുള്ള പ്രവർത്തികൾ ചെയ്യുന്നതെന്നും തന്റെ കയ്യിൽ കെട്ടിയിരിക്കുന്ന നൂലെടുത്ത് കാണിച്ച് തനിക്ക് നേരെയുള്ള ദുഷിച്ച കണ്ണുകളെ തടയാനാണ് ഇത് കെട്ടിയിരിക്കുന്നത് എന്നും ശിവകുമാർ വ്യക്തമാക്കി. ഓരോരുത്തരും അവരുടെ വിശ്വാസങ്ങൾക്ക് അനുസരിച്ച് ചെയ്തോട്ടെ. അവർ ആഗ്രഹിക്കുന്ന കാര്യങ്ങൾക്ക് വേണ്ടി അവർ ശ്രമിക്കട്ടെ. തനിക്ക് സ്വയം സംരക്ഷിക്കാനാകുമെന്നും ശിവകുമാർ പറഞ്ഞു.