2014 ന് ശേഷം നിർമ്മിച്ചതോ ഉദ്ഘാടനം ചെയ്തതോ ആയ പാലത്തിനു സമീപം പോകരുത്; കേന്ദ്രസർക്കാരിനെ വിമർശിച്ച് പ്രകാശ് രാജ്

കേന്ദ്രസർക്കാരിനെ വിമർശിച്ച് നടൻ പ്രകാശ് രാജ്. മൺസൂൺ മുന്നറിയിപ്പുകൾ എന്ന് പറഞ്ഞുകൊണ്ടാണ് കുറിപ്പ് ആരംഭിക്കുന്നത്. "നനഞ്ഞൊഴുകുന്നത് അതിമനോഹരമാണ്.എന്നാൽ 2014 ന് ശേഷം നിർമ്മിച്ചതോ ഉദ്ഘാടനം ചെയ്തതോ ആയ കെട്ടിടങ്ങൾ, പാലങ്ങൾ, വിമാനത്താവളങ്ങൾ, ഹൈവേകൾ, ആശുപത്രികൾ, ട്രെയിനുകൾ എന്നിവയ്ക്ക് സമീപം പോകരുത്.. ശ്രദ്ധിക്കുക" ഇങ്ങനെയാണ് പ്രകാശ് രാജ് സാമൂഹ്യ മാധ്യമമായ എക്‌സിൽ പങ്കുവെച്ച കുറിപ്പിൽ പറയുന്നത്.

ഈ വർഷം ബീഹാറിൽ മാത്രമായി തകർന്നത് 20 പാലങ്ങളാണ്. ഗ്രാമീണ മേഖലയിലെ ചെറിയ പാലങ്ങളാണ് തകർന്നവയിൽ അധികവും. ഈ സാഹചര്യങ്ങൾ നിലനിൽക്കുന്ന പശ്ചാത്തലത്തിലാണ് ഇത്തരത്തിലൊരു കുറിപ്പുമായി പ്രകാശ് രാജ് കേന്ദ്രസർക്കാരിനെതിരെ രംഗത്തെത്തിയത്. ഇതിനോടകം താരത്തിൻ്റെ പ്രതികരണം സോഷ്യൽ മീഡിയയിൽ വലിയ ചർച്ചയ്ക്ക് വഴിതെളിച്ചിട്ടുണ്ട്.