'ജീവിച്ചു നേടിയ' തിളക്കവുമായി പൃഥ്വിരാജ്

ആടുജീവിതത്തിലെ പകരം വയ്ക്കാൻ ഇല്ലാത്ത പ്രകടനത്തിലൂടെ പൃഥ്വിരാജ് മികച്ച നടനായി തെരഞ്ഞെടുക്കപ്പെട്ടു. മരുഭൂമിയിലെ വേദനാജനകമായ ജീവിത രംഗങ്ങൾ ജീവിച്ചു തീർക്കാൻ സാധിച്ചു എന്നത് പൃഥ്വിരാജിന്റെ പുരസ്കാര തിളക്കത്തിന് മാറ്റുകൂട്ടുന്നു. ആടുജീവിതത്തിലൂടെ മൂന്നാം തവണയാണ് പൃഥ്വിരാജ് സംസ്ഥാന ചലച്ചിത്ര പുരസ്കാരത്തിൽ മികച്ച നടനായി തെരഞ്ഞെടുക്കപ്പെടുന്നത്. 2006ൽ പുറത്തിറങ്ങിയ വാസ്തവം എന്ന ചിത്രത്തിലൂടെയാണ് ആദ്യമായി പൃഥ്വിരാജിന് സംസ്ഥാന ചലച്ചിത്ര പുരസ്കാരം ലഭിക്കുന്നത്.

2012 ൽ സെല്ലുലോയിഡ്, അയാളും ഞാനും തമ്മിൽ എന്നീ ചിത്രങ്ങളിലൂടെ രണ്ടാം തവണ മികച്ച നടനായി തിരഞ്ഞെടുക്കപ്പെട്ടു. സമാനതകളില്ലാത്ത അഭിനയ മികവിന് ആടുജീവിതത്തിലൂടെ ഇത് മൂന്നാം തവണ മികച്ച നടനെന്ന നേട്ടം പൃഥ്വിരാജ് സ്വന്തമാക്കി. 2002ൽ രഞ്ജിത്ത് സംവിധാനം നിർവഹിച്ച നന്ദനം എന്ന സിനിമയിലൂടെ മലയാള സിനിമയിലേക്ക് രംഗപ്രവേശനം ചെയ്ത പൃഥ്വിരാജ് സുകുമാരൻ 2024 ൽ മൂന്നാം തവണയും മികച്ച നടനായി തിരഞ്ഞെടുക്കപ്പെടുമ്പോൾ അഭിനയത്തിന്റെ അതുല്യമായ നേട്ടങ്ങൾ സ്വന്തമാക്കുന്ന മലയാള നടനായി മാറി. മലയാള സിനിമയിലെ ചെറുതും വലുതുമായ തിരസ്കരണങ്ങൾ ഏറ്റുവാങ്ങിയ നടനായിരുന്നു പൃഥ്വിരാജ്. പക്വത ഇല്ലായ്മയിൽ നിന്ന് തുടങ്ങി പക്വമായ നേട്ടങ്ങൾ കൈവരിച്ച പൃഥ്വിരാജ് ആദ്യകാലത്തെ സിനിമാ ജീവിതം നൽകിയ വേദനകൾ ഉൾക്കൊണ്ടുകൊണ്ട് നേടിയെടുത്ത വിജയങ്ങളൊക്കെയും മനോഹരമായ അദ്ദേഹത്തിന്റെ പ്രതികാരങ്ങൾ ആയിരുന്നു.

' അത്ര എളുപ്പത്തിൽ ആർക്കും രാജുവിനെ ഇല്ലാതാക്കാൻ കഴിയില്ല. കാരണം അവൻ സുകുമാരന്റെ മകനാണ്. ആ ധൈര്യവും തന്റേടവും അവനിൽ എന്നുമുണ്ട് ' മല്ലിക സുകുമാരൻ പൃഥ്വിരാജിനെ പറ്റി പറഞ്ഞ വാക്കുകൾ ആണിത്. ഒരക്ഷരം തെറ്റാതെ മലയാള സിനിമയുടെ ചരിത്രത്തിൽ എന്നും ഓർക്കാൻ കഴിയുന്ന ഇനിയും ഓർമ്മിക്കപ്പെടാവുന്ന ഒട്ടേറെ നേട്ടങ്ങൾ സ്വന്തമാക്കാനും പൃഥ്വിരാജിന് കഴിഞ്ഞു. നടനായി മാത്രം ഒതുങ്ങാതെ സംവിധായകനായും വിതരണക്കാരനായും തന്റെ ഇഷ്ടത്തിന് അനുസരിച്ച് സിനിമ നിർമ്മിക്കാൻ കഴിയുന്ന സ്വപ്നതുല്യമായ 'പൃഥ്വിരാജ് പ്രൊഡക്ഷൻസ്' എന്ന നിർമ്മാണ കമ്പനിയും പൃഥ്വിരാജിന്റെ നേട്ടങ്ങളിലെ നാഴിക കല്ലുകളാണ്. സിനിമ എന്ന സ്വപ്നമാണ് പണത്തേക്കാൾ അധികം വിലമതിക്കുന്നതായി പൃഥ്വിരാജ് കണ്ടിട്ടുള്ളത്. ആടുജീവിതം എന്ന സിനിമ പൃഥ്വിരാജിന്റെ അർപ്പണ മനോഭാവത്തിന്റെയും സിനിമയോടുള്ള അഗാധമായ സ്നേഹത്തിന്റെയും പ്രതിഫലനങ്ങൾ ആയിരുന്നു. പൃഥ്വിരാജിന്റെ കഠിനാധ്വാനത്തിന്റെ ഓരോ അവശേഷിപ്പുകളും ആടുജീവിതം എന്ന സിനിമ ഒപ്പിയെടുത്തിരിക്കുന്നു.