കടമ്മനിട്ട രാമകൃഷ്ണന്‍ പുരസ്‌ക്കാരത്തിന് റഫീഖ് അഹമ്മദ് അര്‍ഹനായി
പത്തനംതിട്ട: കടമ്മനിട്ട രാമകൃഷ്ണന്‍ ഫൗണ്ടേഷന്‍ ഏര്‍പ്പെടുത്തിയ ഈ വര്‍ഷത്തെ കടമ്മനിട്ട രാമകൃഷ്ണന്‍ പുരസ്‌ക്കാരത്തിന് കവിയും ഗാനരചയിതാവുമായ റഫീഖ് അഹമ്മദ് അര്‍ഹനായി. കവിതയിലെ സമഗ്രസംഭാവനക്കാണ് അവാര്‍ഡ്. 55,555 രൂപയും പ്രശസ്തിപത്രവും ശില്‍പവും അടങ്ങുന്നതാണ് പുരസ്‌കാരം.
കടമ്മനിട്ട രാമകൃഷ്ണന്‍ ഫൗണ്ടേഷന്റെ സെക്രട്ടറിയായിരുന്ന എം.ആര്‍. ഗോപിനാഥന്റെ സ്മരണാര്‍ഥം യുവകവികള്‍ക്ക് ഏര്‍പ്പെടുത്തിയ ആര്‍. ഗോപിനാഥന്‍ അവാര്‍ഡിന് വിജു കടമ്മനിട്ടയെ തെരഞ്ഞെടുത്തു.മാര്‍ച്ച് 31ന് കടമ്മനിട്ട സ്മൃതിമണ്ഡപത്തില്‍ നടക്കുന്ന അനുസ്മരണ സമ്മേളനത്തില്‍ ഫൗണ്ടേഷന്‍ പ്രസിഡന്റ് മുന്‍ വിദ്യാഭ്യാസ-സാംസ്‌കാരിക മന്ത്രി എം.എ. ബേബി അവാര്‍ഡുകള്‍ സമര്‍പ്പിക്കും. വാര്‍ത്തസമ്മേളനത്തില്‍ ഫൗണ്ടേഷന്‍ ഭാരവാഹികളായ വി.കെ. പുരുഷോത്തമന്‍പിള്ള, ബാബു ജോണ്‍, ആര്‍. കലാധരന്‍, ഡോ. എം.ആര്‍. ഗീതദേവി എന്നിവര്‍ പങ്കെടുത്തു.