തെരുവുനായ ആക്രമണം; ആലപ്പുഴയിൽ വിവിധയിടങ്ങളിലായി നിരവധിപേർക്ക് കടിയേറ്റു

പൂച്ചാക്കൽ: ആലപ്പുഴയിൽ വിവിധയിടങ്ങളിൽ തെരുവുനായ ആക്രമണം. പാണാവള്ളിയിൽ 2 സ്ത്രീകളെ തെരുവുനായ ആക്രമിച്ചു. ഇരുവരുടെയും കാലിൽ കടിയേറ്റു. പാണാവള്ളി പഞ്ചായത്ത് 7–ാം വാർഡ് മാരുവള്ളിൽ ശശിധരൻ നായരുടെ ഭാര്യ ഗോമതി (69), 6–ാം വാർഡ് ആശാനിവാസിൽ ഗോപിനാഥൻ നായരുടെ ഭാര്യ ശ്രീദേവി (71) എന്നിവർക്കാണു ക‌ടിയേറ്റത്. കഴിഞ്ഞ ദിവസം ഇരുവർക്കും കുട്ടൻചേരിൽ റോഡിൽ വച്ചാണ് കാലിൽ കടിയേറ്റത്.

ഗോമതി സഹോദരന്റെ വീട്ടിൽ പോയ ശേഷം വീട്ടിലേക്കു വരുമ്പോഴും ശ്രീദേവി പുല്ല് പറിക്കാൻ ഇറങ്ങിയപ്പോഴുമാണ് കടിയേറ്റത്. ഇവർ എറണാകുളം ജനറൽ ആശുപത്രിയിൽ ചികിത്സ തേടി. രണ്ടും ഒരേ നായതന്നെയാണെന്നാണ് പുറത്ത് വരുന്ന വിവരം. മേഖലയിൽ തെരുവുനായ ശല്യം രൂക്ഷമാണ്. അധികൃതർ പരിഹാരം കണ്ടെത്തണമെന്ന് ആവശ്യം ശക്തമായിട്ടുണ്ട്.

അതെസമയം കലവൂർ യുവാവിനെ കടിച്ച ശേഷം ചത്ത നായയ്ക്ക് പേവിഷ ബാധയുള്ളതായി പരിശോധനാ ഫലം. കലവൂർ കയർ ബോർഡിനു പടിഞ്ഞാറ് മാരാരിക്കുളം തെക്കു പഞ്ചായത്ത് ആറാം വാർഡിലെ യുവാവിനാണ് കഴിഞ്ഞ ദിവസം റോഡിലൂടെ നടക്കുമ്പോൾ നായയുടെ കടിയേറ്റത്. സംശയം തോന്നിയതിനാൽ നായയെ പൂട്ടിയിട്ടു.

പിന്നീട് നായ ചത്തതോടെയാണ് ആശങ്കയായത്. ആദ്യം നായയെ കുഴിച്ചിട്ടെങ്കിലും പിന്നീട് മൃഗസംരക്ഷണ വകുപ്പ് അധികൃതരുടെ നേതൃത്വത്തിൽ പുറത്തെടുത്ത് പോസ്റ്റ്മോർട്ടത്തിന് അയയ്ക്കുകയായിരുന്നു.