ഗൂഗിള്‍ തലപ്പത്ത് അഴിച്ചുപണി; ജീവനക്കാര്‍ക്ക് സന്ദേശമയച്ച് സുന്ദര്‍ പിച്ചൈ

കാലിഫോര്‍ണിയ: ഗൂഗിളിന്റെ തലപ്പത്ത് വന്‍ അഴിച്ചുപണി. നേതൃമാറ്റം സംബന്ധിച്ച് ഗൂഗിള്‍ സി ഇ ഒ സുന്ദര്‍ പിച്ചൈ ജീവനക്കാർക്ക് മെമ്മോ നൽകി. ദീര്‍ഘകാലമായി സെര്‍ച്ച് ആന്‍ഡ് ആഡ്‌സ് മേധാവിയായിരുന്ന പ്രഭാകര്‍ രാഘവനെ ചീഫ് ടെക്‌നോളജിസ്റ്റായി നിയമിച്ചു. നിക്ക് ഫോക്‌സാണ് പുതിയ സെര്‍ച്ച് മേധാവി. ആര്‍ട്ടിഫിഷ്യല്‍ ഇന്റലിജന്‍സ് മത്സരത്തില്‍ കൂടുതല്‍ കരുത്താർജിക്കാൻ കൂടി വേണ്ടിയാണ് ഗൂഗിള്‍ ടീമുകളെ പുനഃസംഘടിപ്പിക്കുന്നത്. സെര്‍ച്ച്, പരസ്യങ്ങള്‍, വാണിജ്യ ഉത്പന്നങ്ങള്‍ എന്നിവ ഉള്‍പ്പെടുന്ന ഗൂഗിളിന്റെ നോളജ് ആന്‍ഡ് ഇന്‍ഫര്‍മേഷന്‍ വിഭാഗത്തെ നിക്ക് ഫോക്‌സ് നയിക്കുമെന്നും സുന്ദര്‍ പിച്ചൈ കൂട്ടിച്ചേർത്തു. കമ്പനിയുടെ പരസ്യ ബിസിനസ് യൂണിറ്റില്‍ ജോലി ചെയ്തിരുന്ന പരിചയവും കഴിഞ്ഞ കുറച്ച് വര്‍ഷങ്ങളായി അദ്ദേഹം ഗൂഗിളിന്റെ എഐ ഉത്പന്നങ്ങളുടെ റോഡ്മാപ്പ് രൂപപ്പെടുത്തുന്നതില്‍ സഹായിയും ആയിരുന്നുവെന്നും സുന്ദര്‍ പിച്ചൈ കൂട്ടിച്ചേർത്തു.