കാട്ടാക്കട: ഊരൂട്ടമ്പലം നീറമൺകുഴിയിൽ പ്രവർത്തിച്ചിരുന്ന ബ്രദേഴ്സ് പെറ്റ് ഷോപ്പിലെ വിവിധയിനം പക്ഷികളെ തീവച്ചു കൊന്നതായി കണ്ടെത്തി. ചപ്പാത്ത് സ്വദേശി ഷിബിന്റെ ഉടമസ്ഥതയിലുള്ള ഷോപ്പിലാണ് കഴിഞ്ഞദിവസം രാത്രിയിൽ ഈ ക്രൂരത കാണിച്ചത്. ഞായറാഴ്ച ഉച്ചയ്ക്ക് ഷോപ്പ് തുറന്നപ്പോഴാണ് വിവിധയിനം പക്ഷികൾ ഉൾപ്പെടെയുള്ള ജീവികൾ ചൂടേറ്റും പുകയും കൊണ്ട് ചത്ത നിലയിൽ കണ്ടെത്തിയത്. രണ്ട് ലക്ഷത്തോളം രൂപയുടെ നഷ്ടം ഉണ്ടായതായി പറയുന്നു. ഇരുട്ടിന്റെ മറവിൽ ലഹരിക്ക് അടിമകളായ സാമൂഹ്യവിരുദ്ധരുടെ തേർവാഴ്ചകളാണ് ഈ പ്രദേശത്ത് എന്ന് നാട്ടുകാർ ആരോപിക്കുന്നു ഫോറൻസിക് വിഭാഗവും മാറനല്ലൂർ പോലീസും സംഭവസ്ഥലത്ത് എത്തി പരിശോധനകൾ നടത്തി കേസ് രജിസ്റ്റർ ചെയ്തു.
